விளங்கட்டும்; திரை விலகட்டும்
போரைத் தொடர்ந்து புரிவோரால்
.. பொல்லாப் பகையே புரையோட,
பார வாழ்வைப் பரிசேற்றுப்
.. பாச மென்றும் பழகாதோர்
ஈரக் கண்கள் இனியின்றி
.. இயல்பாய் வாழ்க்கை இயங்கட்டும்,
வீரம் அதுவாய் விளங்கட்டும்
.. விழிஆர் திரையும் விலகட்டும் (1)
பாரே தமதாய்ப் பார்ப்போர்க்குப்
.. பாதை யெல்லாம் பரிசாகும்;
யாரோ எவரென் றறியாது
.. யாவர்க் குமீயும் பழமரம்போல்
ஆராய்ந் துதவி அளிக்காது
.. யாருங் களிக்க அன்பொன்றே
வேராய் பூவாய் விளங்கட்டும்
.. வெற்றுத் திரையும் விலகட்டும் (2)
சொற்ப நாளே தொல்லுலகில்,
.. தொலைப்பின் வாழ்வும் தொலைந்தேகும்;
அற்ப வெற்றி யதைக்காண
.. அன்பின் வழியை அடைத்தோரும்
கற்கும் விதத்திற் கற்பிப்போம்,
.. காண்போம் வெற்றி, காழ்ப்பதனை
விற்கும் அவர்க்கு விளங்கட்டும்
.. விதியின் திரையும் விலகட்டும் (3)
வட்டப் பரிதி வளையத்தே
.. ஒற்றைப் புவனம், ஒன்றியதில்
இட்டப் படிநாம் இனிதாக
.. இல்லான் செல்வன் என்றெண்ணா
தொட்டி ஒழுகின் ஒருநாளிவ்
.. வுண்மை உரைக்கும்; உறுபகையும்
விட்டிப் புதிரும் விளங்கட்டும்
.. விடைமறை திரையும் விலகட்டும் (4)