மனமெனும் மணற்றிடல்
மனமெனும் எல்லை யில்லா
.. மணற்றிடல் அரங்க மாக
தினமொரு விதமாய்த் தோன்றும்
.. சிந்தனை பந்தாய் மாறும்;
கனவெனும் காலிற் பட்டுக்
.. களத்தினைப் பந்து மீற
நனவெனும் நடுவர் பந்தை
.. நடுக்களம் வைத்துப் போவார் (1)
விதமொரு விந்தை சேர்க்கும்
.. வித்தகக் கனவுக் காலால்
உதைபட எண்ணப் பந்தோ
.. உலவிடும் உயரே வானில்;
சிதைவுறும் எண்ணம் சற்றே
.. தொய்திடும் வேளை காலோ
அதைவிடுத் தடுத்தோர் பந்தை
.. அடித்திடும், அதுவே றெண்ணம் (2)
வலமிடும் பந்தை நம்முன்
.. வரவிடா வண்ணம் ஐந்துப்
புலன்களும் போட்டி யிட்டுப்
.. புறம்நமை பிடித்துத் தள்ளும்;
இலக்கதை மறைத்து நிற்கும்
.. எதிரணிக் கிவையே வீரர்;
கலக்கிநம் நெஞ்சக் கூட்டிற்
.. கலவரம் யாவும் செய்யும் (3)
தரைவரும் பந்தைக் கண்கள்
.. தவிர்த்திடும்; காதோ ஓசை
பரவிடும் அரங்கம் நோக்கிப்
.. பார்த்திட வைக்கும்; மெய்யில்
விரவிடும் விரலைக் காண
.. விழைகையில் விலகும் பந்து;
கரமிணைத் தைந்தும் அங்கே
.. களிப்புற, சிதறும் சிந்தை (4)
தொலைவமர் கூட்டக் கண்கள்
.. தொடர்ந்திடும் பந்தை நோக்கும்;
இலக்கைநாம் நெருங்கும் போதே
.. இருகரம் தட்டி வாழ்த்தும்;
விலகியே எதிரி சார்பாய்
.. விரைந்திடும் பந்தைக் கண்டுப்
பலவித வார்த்தை பேசும்,
.. பதரென நம்மைத் தூற்றும் (5)
நிலையிலாப் பந்தை மெல்ல
.. நிறுத்தியே தூரம் தோன்றும்
இலக்கதை ஒன்றே எண்ணும்
.. இயல்புடன் குவித்து நெஞ்சை
கலக்குமவ் வைந்தும் பொய்க்கக்
.. கடுமையாய் எதிர்த்த வற்றை
விலக்கிடும் வண்ணம் ஆடி
.. வெற்றியைக் காணல் வேண்டும் (6)
வழியெலாம் ஏற்றஞ் சேர்க்க
.. வாய்ப்புகள் வரும்பின் போகும்;
விழியினைத் திறந்து, வாய்க்கும்
.. வேளையில் ஆட வேண்டும்;
கழிவென ஏதிங் கஃதும்
.. கண்டிரா வாய்ப்பே; காற்றுச்
சுழிதனில் இலையைப் போலே
.. சொல்லொனா உயரம் செல்வோம் (7)