காலக்கொடி
எல்லாம் நிலைத்தெதும் இயங்கா தாயும்
நில்லாப் பொருளாய் நீண்டிடும் காலம்;
ஒற்றைக் கோடாய் ஒருதுளிக் கீற்றாய்
வற்றா தோடும் வழக்குடை ஆறு!
நிகழ்வைக் கொல்லும் நிரந்தரக் கூற்றன்!
அகழ்ந்திடற் கரிய ஆழப் பெருங்கடல்!
திருப்பம் இல்லாத் திசைசெலும் தெருவில்
விருப்பும் வெறுப்பும் விலக்கிய பயணம்!
உயிருள பொருளை உரசும் போக்கில்
வயதெனும் மாற்றம் வழங்கும் மாயன்!
கழித்தல் அறியாக் கணக்கியல் மூலம்!
ஒழிப்பில் பிறப்பாய் உயிரின் தோற்றம்!
நீற்றுப் போகும் நிகழ்வை நினைவாய்
ஆற்றுப் படுத்தும் அற்புதப் பாணன்!
முப்பரி மாணம் முழுதையும் அசைத்துச்
செப்படி வித்தை செய்திடும் காலன்!
நான்காம் கோணம் நடக்கும் விதத்தால்
மூன்றில் மாற்றம் முடித லானது!
கணங்கள் முகிழ்க்கும் காலக் கொடியில்
நிணங்கொள் காயம் நிழற்கனி ஆமே!